Bagong buhay sa bagong taon…

Parang kailan lang at natapos na ang taong 2007. Ano nga ba ang mga bagay na dumaan sa ating mga buhay sa taong ito. Maraming masasaya at malulungkot na kuwento ang pinagdaanan mula sa ating mga sarili, pamilya, kaibigan, trabaho at problema sa bansang pinanggalingan. Sa tuwing sasapit ang bagong taon marami ang nagtatanong, kung ano ang ating mga new year’s resolution? Puro ito SANA at DAPAT…may mga nagsasabing
‘Sana sa taong ito wala ng kaguluhan at pagkakaisa na lang ang isipin ng bawat tao.’
‘ Dapat ay tigilan ko na ang aking bisyo na makakasira sa buhay ko’
iilan lamang yan sa mga hiling natin tuwing sumasapit ang bagong taon. Familiar tayo sa isang pinoy song na may linyang
“ bagong taon at mag bagong buhay ng lumigaya ang ating bayan”…
kinanta mo ano? Isa lamang ito sa mga linya doon sa kanta na minsan nang naging parte na ng buhay ang pagbabago, kung iisipin natin ay hindi naman kailangang hintayin pa ang bagong taon para mag bagong buhay. Dahil ang pagbabago ay nasa sarili rin natin kung paano natin talunin ang mga tukso na nakakasira sa ating buhay at ating kapwa tao. Mga kabayan gawin po nating bagong taon at pagbabagong buhay ang bawat araw na ginawa ng diyos. Na sa tuwing tayo ay nagigising at nakikita ang ganda ng buhay gawin nating inspirasyon ito para harapin ang bawat pagsubok sa ating mga sarili, pamilya at sa mga taong nakapaligid sa atin. Hindi po biro o madali ang responsibilidad sa buhay dito sa ating mundong kinagagalawan, dahil para tayong isang ubra maestra ng ating mahal na tagapaglikha na inalay ang buhay para tubusin ang ating mga kasalanan. Iba’t iba man ang ating paniniwala o pananampalataya sa kahulihulihan iisa lang ang pinagmulan.

Lahat naman tayo ay mayroong mga SANA at DAPAT sa pagsapit ng bagong taon. Pero marami pa rin sa atin ang hindi nasusunod ang mga kahilingan na ito, dahil tayo mismo ay hindi handa para sa mga pagbabagong ating hinahangad sa buhay. Determinasyon at pagsisikap ang tanging susi para ating
maabot ang mga bagay ng ito. Sa personal kong karanasan marami din akong mga SANA at DAPAT tuwing sasapit ang bagong taon. May mga bagay na hindi rin inaasahan na dumarating. Minsan isa lamang ako sa mga malugod na tagasubaybay ng The Filipino Magazine na dati’y Q8 pinoy pa. Natatawa sa mga jokes, naiinspire sa bawat pahina na aking nababasa at nakikita ang mga kaibigan ko sa snapshots. Sinabi ko sa sarili na SANA balang araw ay ako rin ang makikita at mababasa nila sa magasin. Taong 2007 nabigyan po ako nga pagkakataon na makilala ang mga taong nasa likod ng magasin na ito. “GOD is so Good” at isa sa mga SANA ko ay natupad na, nakakasama na ako sa mga bawat pahina na inaabangan ng ating mga kakabayan dito sa Kuwait. Hindi po pala ganun kadali lalong lalo na sa isang kagaya ko na nangangapa pa lang sa larangan ng pagsusulat, minsan baluktot na pagtatagalog pero ang importante ay naiintindihan ng aking mga taga subaybay. At patuloy nilang tinatangkilik ang aking column na nagbibigay sa akin ng inspirasyon na ipagpatuloy ang nakahiligan kong ito mahirap man pero nawawala ang lahat ng pagod at puyat ko sa tuwing na iisip ko na marami sa inyo ang natutuwa at naiinspire sa aming naisusulat. Sana patuloy ang pagkakataon na ito na makakasama kayo.
Aminado ako na ito ay isang subok lamang, dahil sa pagkakataong dumating at sa hilig ko rin na magsulat. Malaking karangalan din sa akin na bigyang tiwala ng mga kapwa ko pinoy dito sa Kuwait lalong lalo na pagdating sa mga personal nilang buhay. Iba’t ibang larawan ng buhay ang aking nakakasalamuha sa bawat tanong na aking natatanggap mapa text man o emails na nakakapagbigay sa akin ng inspirasyon. Walang mahirap sa buhay na abutin kung tayo mismo ay magpakita ng buong tapang at tiyaga na makuha o maabot ang ating mga munting pangarap.

Sabi ko nga sa aking sarili tuwing ako ay nag-iisa, “I am just a dreamer””. Aminado ako na hindi rin kami ganun kayaman para maranasan ang karangyaan sa buhay. May mga bagay dati na gusto kong makuha pero hindi napapa sa akin, ang sabi ko na lang sa sarili ko, balang araw darating din siguro na makukuha ang mga gusto ko.Bawat isa sa amin ay nagsumikap, Nakatapos ako ng pag-aaral at mapalad na napunta dito sa Kuwait. Hindi naging maramot sa akin ang kapalaran dahil maganda naman ang ibinunga ng pakikipagsapalaran ko sa ibang bansa. Namuhay ng simple, unti-unting naranasan ang ginhawa sa buhay at nabigyan ng kaligayahan ang aking magulang at pamilya sa Pilipinas. Walang imposible sa buhay kung tayo ay determinadong harapin ito. Mga bagay na dapat natin isaisip na Sa bawat pagkadapa, kayanin po nating bumangon, Sa bawat pagkakamali sa buhay gawin mong malaking leksyon na dapat nating itama, sa bawat taong iyong naging kaaway pagpapatawad ang iyong maging hanggad, sa bawat pagsapit ng dilim ay may liwanag na naghihintay At sa bawat estorya ay may umpisa at may katapusan.

Isa lang po ako sa magpapatunay na hindi po masama ang mangarap o umaasa, dahil lahat tayo ay may nakalaang plano sa panginoon. Sabi nga nila nakaguhit na sa ating mga palad ang buhay na ating makakamit. Pero para rin itong isang halaman na tutubo kung itatanim pero pag hindi mo diniligan ay mamatay din. Ang swerte ay nandyan lang yan sa bawat isa sa atin kung hindi man ngayon,baka bukas o sa mga darating pang panahon depende kung paano mo gawing maayos ang iyong buhay. Marami sa atin ang nawawalan ng pag-asa konting pagsubok lamang ay ayaw ng ituloy ang laban mga kabayan hindi po natin malalaman kung gaano tayo katatag kung takot tayong harapin ang mga ito. May kasabihan nga tayo na “Try and try until you succeed”. kaya wag po natin bigyan ng limitasyon ang ating mga sarili, palawakin po natin ang pag iisip at manatiling matatag sa bawat unos na haharapin. Walang bagay na mahirap kung tayo mismo ay magsusumikap. ang buhay ay weather weather lamang iyan minsan Masaya at minsan naman malungkot, lahat po tayo ay nakakaranas ng ganitong sitwasyon kaya wag mong isipin na ikaw ay nag iisa. Maswerte pa rin tayo dahil nabubuhay at nakakasama ang ating mga mahal sa buhay. Isang napakalaking regalo ang bawat araw at taon na dumadating sa atin.

Sa taong ito wag po natin hayaan na mamahay ang sama ng loob sa ating mga puso, buksang muli sa mga taong minsan nating sinaraduhan. Dahil ang taong may puot o sama ng loob kailan man ay hindi magiging Masaya at uunlad. Walang masama sa pagpapatawad, kung ang mahal na panginoon ay sinakripisyo ang sariling buhay para tubusin tayo sa ating mga kasalanan tayo pa kayang tao lamang. Sa pagbabagong buhay ay isa itong parte na kailangan wag isantabi. Napakaimportante din po ang mga taong nakapaligid sa atin lalong lalo na ang ating mga pamilya, kaibigan at kasamahan sa trabaho na nandyan lang sa tuwing may mga bagay ka na kailangan. Sana ang lahat ng ating mga pangarap ay unti-unti nang maabot at maranasan ang kaginhawaan sa buhay. At ang pagkakaisa ng bawat tao sa buong mundo para sa kapayapaan ng bawat isa sa ating mga bansa. Para Sa ating mga OFW na sana ay bigyan pa tayo ng lakas ng ating mga sarili upang sa patuloy na pakikibaka sa mga bansang banyaga para sa ating mga pamilya at bayan.At higit sa lahat Sana patuloy pa rin ang pagsubaybay sa atin ng ating mahal na panginoon sa ating pagharap sa bawat paghamon o pagsubok na dumarating.

Manigong bagong taon po para inyong lahat, maraming salamat sa patuloy na pag tatangkilik ng The Filipino Magazine. Sana ay magsama-sama pa rin tayo sa taong 2008.